Uppheimaskáld

Laugardagskvöldið 14.desember 2013 stigu sex skáld og rithöfundar, sem gefa út hjá forlaginu Uppheimum, í pontu í Populus tremula undir styrkri stjórn okkar manns Aðalsteins Svans Sigfússonar. Skáldin voru og eru Guðbrandur Siglaugsson, Örlygur Kristfinnsson, Bjarki Karlsson, Ragnar Hólm kom svo og las fyrir Pálma Gunnarsson, Urður Snædal og Sigmundur Ernir Rúnarsson. Þetta var skemmtileg kvöldstund á aðventu og uppbyggilegri en margt sem fram fer um þetta leyti. Hafið kæra þökk fyrir.

Guðrún Pálína í Populus tremula.

Laugardaginn 30.11.2013 opnaði Guðrún Pálína Guðmundsdóttir mjög fína sýningu á portrettum í Populus tremula. Allar myndirnar eru unnar á síðasta ári, en Guðrún Pálína er núverandi bæjarlistamaður Akureyrarbæjar. Þetta var síðasta myndlistasýningin í Populus tremula árið 2013 þó ekki síðasti viðburðurinn. Takk fyrir.

HogH og fleiri á tónleikum í Populus tremula

Laugardagskvöldið 23.nóvember voru þessir líka fínu tónleikar í Populus tremula. Fyrstur á svið var Þorsteinn Kári einn með gítarinn og var einfaldlega frábær. Þá kom tríóið Mafama og það var stuð og gleði, þeir piltar komu skemmtilega á óvart. Aðalnúmer kvöldins var svo Helgi og Hljóðfæraleikararnir og þeir klikkuðu auðvitað ekki og stemmingin var engu öðru lík. Þúsundir þakka fyrir kvöldið allt.