Laugardaginn 18.12.2010 opnaði Georg Óskar Manúelsson stórskemmtilega sýningu í Populus Tremula. Fjörlegar teikningar og málverk og pírumpár á striga, sór sig svolítið í ætt við graffíti-list. Hressandi í skammdeginu. - Sömu helgi var að sjálfsögðu jólabazar Beate og Helga á sama stað. - Gaman í gilinu.
Nú er desember, mánuður Bazars Beate og Helga frá Kristnesi í Populus Tremula. Allar helgar í mánuðinum og síðustu dagana fyrir jól eru þau ásamt fleirum með sinn fína varning til sölu og sýnis. Sannarlega upplyfting í skammdeginu. Laugardaginn 11.12.2010 voru þau heillahjónin með tískusýningu á sinni flottu hönnun og saumaskap, það var og fyrsti í jólatrjásölu og bara gaman að vera á Populussvæðinu.
Laugardaginn 27.11.2010 opnaði Rósa Sigrún Jónsdóttir mjög skemmtilega sýningu í Populus tremula, hvar leikið var með fíngerðan vefnað, ljós og skugga undir yfirskriftinni “Hvað er að konunni ?”. Við þökkum fyrir okkur.
Föstdagskvöldið 19.11.2010 fékk Populus Tremula góða heimsókn að austan. Það voru meðlimir ljóðafélagsins Hása Kisa á Héraði ásamt gestum og sérstökum Akureyrargesti frá Hrísey. Fluttu þau ljóð sín af gáska og hæfilegri alvöru svo úr varð mjög notalega kvöldstund.
Takk fyrir
