Þagnar-Freyja við Populus Tremula

Nú er nýhafin sýningin Freyjumyndir.
Populusmaðurinn Kristján Pétur Sigurðsson staðsetti sína Freyju fyrir utan gluggann á Populus Tremula og vonar að hún verði ekki fyrir algjöru ónæði í sumar.
Nánar um Þagnar-Freyju hérna.

Guðrún Pálína í Populus Tremula.

Laugardaginn 20. júní 009 opnaði Guðrún Pálína sýninguna Portrett í Myndlistarsal Populus Tremula. Verkin á sýningunni vann Guðrún Pálína út frá fjórum einstaklingum sem allir eiga sama afmælisdag og rýndi m.a. í stjörnukort þeirra.
Þetta var síðasta myndlistarsýning í Populus Tremula á vorönn.

Arnar Tryggvason sýnir í JVGallerí.

Arnar Tryggvason hinn knái gjaldkeri Populus Tremulasamsteypunnar, opnaði stórgóða sýningu á tölvuunnum landslagsmyndum í Jónas Viðar Gallerí ( á hæðinni fyrir ofan Populus Tremula ) laugardaginn 13. júní 009. Annar Populusmaður Kristján Pétur, sló gígju og brast í söng við opnunina.
Til hamingju með sýninguna Arnar.

Skrokkabandið og Mogadon í Populus Tremula

Okkar dúó, Hið Aðallega Skrokkaband og hljómsveitin Mogadon með Harald Davíðsson í fararbrjósti, tróðu upp í Populus Tremula með leik og söng föstudagskvöldið 12. júní 009.
Allt fór afbragsvel fram.

ROKKtónleikar 31. maí

Þetta var ROKKhelgi í Populus Tremula. Laugardagskvöldið 31.5.009 voru aftur tónleikar en nú með Sudden Weather Change og Reykjavík, sem fóru saman á fjögurra daga túr um landið og tónleikarnir í Populus Tremula voru fimmtu og síðustu tónleikar túrsins. Tim Holehouse, DeathMetal Supersquad og Buxnaskjónar hituðu upp. Þetta var mikið fjör og nettur hávaði. Skemmtilegt og skrautlegt.
Takk fyrir rokkið piltar.

Rokktónleikar 30.maí

Akureyrarhljómsveitirnar Völva og Buxnaskjónar héldu tónleika í Populus Tremula 30.5. 009, ásamt Tim Holehouse frá Bretlandi og hinni alíslensku DeathMetal Supersquad. Þetta voru skemmtilegir tónleikar og gestirnir, sem hefðu getað verið fleiri, áttu svikalaust góða kvöldstund.

Ásta Bára sýnir í Populus Tremula

Laugardaginn 23.maí 009 opnaði Ásta Bára Pétursdóttir sýningu á nýjum olíumálverkum í Populus Tremula.

Í réttri hæð í Populus Tremula

Laugardaginn 16.maí 009 opnuðu Aðalsteinn Svanur, Arnar Tryggvason, Gunnar Kr., Kristán Pétur, Jón Laxdal og Þórarinn Blöndal samsýninguna " Í réttri hæð ". Myndverkin voru hengd upp í aðgengilegri hæð fyrir þau sem eru kanski bara ennþá smá, eða hafa af lífinu lent í stól á hjólum. Það var fjör við opnun í vorblíðunni og fjölmargir tróðu upp, t.d. röppuðu allir sýnendur Goðmund á Glæsivöllum.

Kjartan Sigtryggsson teiknar

Laugardaginn 9.5.009 opnaði Kjartan Sigtryggsson stórgóða sýningu á teikningum ( bæði nokkuð hefðbundnum og tölvuunnum ) í sal Populus Tremula.

Húllumhæ til heiðurs starfsfólki Ásprent Stíl

Laugardagskvöldið 2. maí 009 hélt Populus tremula lokað skemmtikvöld fyrir starfsfólk Ásprents Stíls.
Með þessu vildu félagsmenn í Populus þakka Ásprenti Stíl með sínum hætti fyrir ómetanlegan stuðning fyrirtækisins við starfsemi Populus tremula frá upphafi, haustið 2004.
Það var hopp það var hó og það var hí. Húsbandið spilaði, trúbadúrinn Aðalsteinn Svanur var í essinu sínu og Konni og Ólöf Valsdóttir sungu meðal annars texta eftir afmælisbarnið, sjálfan PapaPopulus. En Populusliðar færðu Papa Sigurði gjöf, sem mölur og ryð fær ekki grandað og afmælissöngurinn var kyrjaður undir knárri stjórn Hjálmars.

Skakkamanage í Populus Tremula 1.maí

Fyrstamaíhátíðahöldin í Populus Tremula anno 2009 voru stórskemmtilegir tónleikar Skakkamanage.
Konni okkar maður hitaði upp sem Sickbird og Máni sonur hans var honum innanhandar. Prins Póló og Létt á Bárunni komu á undan Skakkamanage, en það er nú ekki fjarskyldur mannskapur þeim í Skakka.
Semsagt stórgott og eftir gigg djömmuðu okkar menn Arnar og Gunni með.

Harpa Örvarsdóttir sýnir í Populus Tremula 25.4.

Harpa Övarsdóttir opnaði sallafína sýningu í Populus Tremula kosningarlaugardaginn 25.4. 009, undir yfirskriftinni "Líkami Sálar". Myndirnar eru unnar á gler og eru hugsaðar sem Rauður, fyrsta sería af sjö í "Líkama Sálar" og jafnframt litur fyrstu orkustöðvarinnar af sjö. En Harpa segir um hugmynd sýningarinnar, " við getum líkt okkur við kassa, bara í mismunandi umbúðum. Jafnvel brothætta glerkassa sem hafa að geyma dýrmæta sál og orkustöðvar sem þarf að fara vel með svo hann brotni ekki".