Aðalsteinn Þórsson sýnir

Kristnesingurinn Aðalsteinn Þórsson, sem þó býr í Hollandi, sýndi teikningar og gaf út bókina Póstkort í Populus Tremula 21.11.009. Þetta var skemmtileg sýning og frumlega hengd upp.

Tómas Bergmann sýnir

Alþýðulistamaðurinn Tómas Bergmann opnaði sýningu í Populus Tremula laugardaginn 7.11.009. Sýningin bar yfirskriftina Grænland o.fl. og samanstóð af fjölda smámynda, sem listamaðurinn hafði nostrað við að kostgæfni.            

Falleg sýning !

 

 

OPSTRAAT & RESTJES, Japonisma

Feðgarnir Viktor,Ivar og George Hollanders opnuðu skemmtilega sýningu í Populus Tremula 24.10.009. Þeir voru svolítið að láta sig dreyma um Japan og það gerði sig vel.

Elli og Guðbrandur sýna, Aðalsteinn Svanur syngur

Það var sýning og söngur í Populus Tremula föstudagskveldið 11.september. Elli og Guðbrandur Ægir sýndu vídeó og ljósmyndir og Populusmaðurinn Aðalsteinn Svanur trúbador söng.   Einnig tróðu upp sonur Ella og félagi hans. Gott kvöld.

Miðnæturtónleikar á Akureyrarvöku 29.8.

Populus Tremula opnaði fyrir gestum og gangandi kl 23;30 Akureyrarvökukveldið 29.8.2009. Á miðnætti stundvíslega hófust tónleikar.
Fyrstur á svið var þjóðverjinn CT, síðan Populusfélagarnir Kristján Pétur og Arnar við slaghörpuna, þá Konni Sickbird, með Arnarsstoð, Guðrúnar Akureyrarvökustýru og Gunna á trommunum. Því næst kom röðin að Guðmundi Agli og Kristjáni Pétri, og tónleikunum lokuðu Gunnar og Kristján.
Gott og gaman.

Maj Hasager sýnir í Populus tremula 22.-23.8.2009

Danska listakonan Maj Hasager opnaði vetrarvertíðina í Populus Tremula með stórfínni sýningu á ljósmyndum og hugleiðingum frá Palestínu og smámyndum sem hún gerði meðan hún dvaldi í gestavinnustofu Gilfélagsins.

Tak Maj

 

Þagnar-Freyja við Populus Tremula

Nú er nýhafin sýningin Freyjumyndir.
Populusmaðurinn Kristján Pétur Sigurðsson staðsetti sína Freyju fyrir utan gluggann á Populus Tremula og vonar að hún verði ekki fyrir algjöru ónæði í sumar.
Nánar um Þagnar-Freyju hérna.

Guðrún Pálína í Populus Tremula.

Laugardaginn 20. júní 009 opnaði Guðrún Pálína sýninguna Portrett í Myndlistarsal Populus Tremula. Verkin á sýningunni vann Guðrún Pálína út frá fjórum einstaklingum sem allir eiga sama afmælisdag og rýndi m.a. í stjörnukort þeirra.
Þetta var síðasta myndlistarsýning í Populus Tremula á vorönn.

Arnar Tryggvason sýnir í JVGallerí.

Arnar Tryggvason hinn knái gjaldkeri Populus Tremulasamsteypunnar, opnaði stórgóða sýningu á tölvuunnum landslagsmyndum í Jónas Viðar Gallerí ( á hæðinni fyrir ofan Populus Tremula ) laugardaginn 13. júní 009. Annar Populusmaður Kristján Pétur, sló gígju og brast í söng við opnunina.
Til hamingju með sýninguna Arnar.

Skrokkabandið og Mogadon í Populus Tremula

Okkar dúó, Hið Aðallega Skrokkaband og hljómsveitin Mogadon með Harald Davíðsson í fararbrjósti, tróðu upp í Populus Tremula með leik og söng föstudagskvöldið 12. júní 009.
Allt fór afbragsvel fram.

ROKKtónleikar 31. maí

Þetta var ROKKhelgi í Populus Tremula. Laugardagskvöldið 31.5.009 voru aftur tónleikar en nú með Sudden Weather Change og Reykjavík, sem fóru saman á fjögurra daga túr um landið og tónleikarnir í Populus Tremula voru fimmtu og síðustu tónleikar túrsins. Tim Holehouse, DeathMetal Supersquad og Buxnaskjónar hituðu upp. Þetta var mikið fjör og nettur hávaði. Skemmtilegt og skrautlegt.
Takk fyrir rokkið piltar.

Rokktónleikar 30.maí

Akureyrarhljómsveitirnar Völva og Buxnaskjónar héldu tónleika í Populus Tremula 30.5. 009, ásamt Tim Holehouse frá Bretlandi og hinni alíslensku DeathMetal Supersquad. Þetta voru skemmtilegir tónleikar og gestirnir, sem hefðu getað verið fleiri, áttu svikalaust góða kvöldstund.